Lo, I am with you always

There’s nae Bible noo, lassie,
There’s nae Bible noo !
The Buke abune a’ bukes, lassie,
Is a’ broken through.
There’s nae Confession noo, lassie,
There’s nae creed ava’ !
They’ve a’ gaen by like gloamin’ ghosts ;
They’ve melted like the snaw.
There’s nae Sabbath noo, lassie,
There’s nae Sabbath noo :
The holy day our fathers loved
Is a’ broken through.
There’s nae Gospel noo, lassie,
There’s nae Covenant blood :
There’s nae altar noo, lassie,
There’s nae Lamb o’ God.
There’s nae Erskine branch, lassie,
There’s nae Gillespie shoot;
O’ a’ the Marrow plants, lassie,
Not ane has taken root.
There’s nae Chalmers noo, lassie,
There’s nae gude M'Cheyne ;
And the dear, dear cross they preached, lassie,
The dear, dear cross is gane.
Folks dinna want a cross, lassie,
They’ve cutten doun the tree ;
And naebody believes it,
But fules like you and me.
The narrow way to glory
Is now a wide, smooth road ;
The gate that was sae strait, lassie,
They’ve made it big and broad.
And a’ will get to heaven, lassie,
If ony heaven there be ;
For wha believes in hell, lassie,
But fules like you and me ?
We'll no be lang here, lassie,
’Mid a’ this stir and care ;
And the place that kens us noo, lassie,
Will ken us soon nae mair.
The silver heads o’ wisdom, lassie,
Are wearing fast away :
Will the green anes coming up, lassie,
Be wiser than the grey ?
Anon.
—